Gen 48 | NdeIBE | STEP | Ngesinye isikhathi ngemva kwalokho uJosefa wabikelwa ukuthi uyise wayegula. Yikho wasethatha amadodana akhe womabili, uManase lo-Efrayimi wahamba lawo.

Genesis 48

UManase lo-Efrayimi

1 Ngesinye isikhathi ngemva kwalokho uJosefa wabikelwa ukuthi uyise wayegula. Yikho wasethatha amadodana akhe womabili, uManase lo-Efrayimi wahamba lawo.

2 UJakhobe esetsheliwe kwathiwa, “Indodana yakho uJosefa isifikile kuwe,” u-Israyeli wabamba ngamandla wavuka embhedeni.

3 UJakhobe wathi kuJosefa, “UNkulunkulu uSomandla wabonakala kimi eLuzi elizweni laseKhenani, khonapho wangibusisa. 4 Wathi kimi, ‘Ngizakwenza uzuze inzalo bande ubunengi bayo. Ngizalenza libe yisizwe sabantu, njalo ngizakupha lelilizwe libe yilifa elingapheliyo kuzizukulwane zakho ngemva kwakho.’

5 “Zwana-ke amadodana akho amabili owawazalela eGibhithe ngingakezi lapha kuwe azathathwa njengawami; u-Efrayimi loManase bazakuba ngabami, kanjengoba uRubheni loSimeyoni bengabami. 6 Labobantwana abazelwe ngemva kwabo bazakuba ngabakho; kulesosigodi esizakuba yilifa labo bazabhaliswa ngaphansi kwamabizo abanewabo. 7 Ngathi ngibuya ngivela ePhadani, ngehlelwa lusizi ngafelwa nguRakheli elizweni laseKhenani silokhu sisendleleni, bucwadlana kwe-Efrathi. Yikho ngamngcwaba khonapho eceleni kwendlela eya e-Efrathi,” (kutsho eBhethilehema).

8 U-Israyeli wathi ngokubona amadodana kaJosefa wabuza wathi, “Ngobani laba?”

9 UJosefa wathi kuyise, “Ngamadodana uNkulunkulu anginike wona lapha.” U-Israyeli wasesithi, “Balethe kimi ukuze ngibabusise.”

10 Ngalesisikhathi amehlo ka-Israyeli ayesefiphala ngenxa yokuluphala, engasabonisisi. Ngakho uJosefa wasondeza amadodana akhe kuye, uyise wawanga wawagona.

11 U-Israyeli wathi kuJosefa, “Ngangingathembi ukuthi ngizaphinda ngibubone ubuso bakho njalo, ikanti manje uNkulunkulu usengivumele ukubona labantwabakho labo.”

12 UJosefa wasebasusa emadolweni ka-Israyeli wakhothamela phansi ngobuso.

13 UJosefa wasebathatha bobabili, u-Efrayimi kwesokunene sakhe eqondane lesokhohlo sika-Israyeli, kwathi uManase waba ngakwesokhohlo waqondana lesokunene sika-Israyeli, wabasondeza kuye. 14 Kodwa u-Israyeli welula isandla sakhe sokunene wasibeka ekhanda lika-Efrayimi, lokuba yena wayengomncinyane, wasenqumisa izingalo ziphambana, wabeka isandla sakhe sokhohlo ekhanda likaManase, lokuba uManase wayelizibulo.

15 Yikho wasebusisa uJosefa wathi, “Sengathi uNkulunkulu okhokho bami, u-Abhrahama lo-Isaka, abahamba phambi kwakhe, uNkulunkulu obengumalusi wami ukuphila kwami konke kuze kube namuhla,

16 ingilosi engihlengileyo kuzo zonke izingozi – angabusisa abafana laba. Sengathi bangabizwa ngelami ibizo langamabizo abobabamkhulu u-Abhrahama lo-Isaka; njalo sengathi banganda kakhulu emhlabeni.”

17 Kwathi uJosefa ebona uyise ebeka isandla sakhe sokunene ekhanda lika-Efrayimi akwaze kwamthokozisa; yikho wasibamba isandla sikayise wasisusa ekhanda lika-Efrayimi ukuthi asibeke kwelikaManase. 18 UJosefa wathi kuye, “Hatshi, baba, lo nguye izibulo; beka isandla sakho sokunene kwelakhe ikhanda.”

19 Kodwa uyise wala, wathi, “Ngiyazi, ndodana yami, ngiyazi. Laye njalo uzakuba ngabantu abanengi, njalo laye uzakuba mkhulu. Loba kunjalo, umnawakhe uzakuba mkhulu kulaye lezizukulwane zakhe zizakuba ngamaxuku ezizwe.” 20 Wababusisa ngalolusuku wathi, “Ngebizo lakho u-Israyeli uzakutsho lesisibusiso: ‘Sengathi uNkulunkulu angakwenza ube njengo-Efrayimi loManase.’ ” Kanjalo wabeka u-Efrayimi phambi kukaManase.

21 Yikho u-Israyeli wasesithi kuJosefa, “Sengizakufa, kodwa uNkulunkulu uzakuba lani, alibuyisele elizweni labokhokho benu. 22 Wena, njengomuntu olawula abanewenu, ngikunika umqolo welizwe engawemuka ama-Amori ngenkemba yami lomtshoko wami.”